کرک میں پولیس تھانے پر خودکش حملہ

شمال مغربی ضلع کر ک میں ہفتہ کی صبح ایک پولیس تھانے پر ہونے والے خود کش حملے میں دو اہلکار اور ایک بچہ ہلاک جبکہ کم از کم 23 افراد زخمی ہوگئے۔
مقامی حکام نے بتایا کہ خودکش بمبار نے بارود سے بھری گاڑی پولیس تھانے کے اگلے حصے سے ٹکرا دی اور زوردار دھماکے میں عمارت سے ملحقہ مسجد بھی مکمل طور پر تباہ ہوگئی۔
ڈی سی او کرک اجمل خٹک نے بتایا کہ زخمی ہونے والے تمام افراد پولیس اہلکار ہیں جنہیں فوری طور پر ہسپتال منتقل کردیا گیا ہے۔ انھوں نے کہا کہ کرک میں عمومی طور پر عسکریت پسندوں کی سرگرمیاں نا ہونے کے برابر ہیں اور حملہ آور عین ممکن ہے قریبی ضلع بنوں سے آیا ہو جہاں اس طرح کے حملے ہو تے رہے ہیں۔